Rev Francisco BilogDeut. 6:10-13; 16:1-17; Psalm 100:1-5; Matt. 28:1-10
Naragsac ken nasantuan ti panagrambac tayo iti daytoy nga agsapa. Nasantuan agsipud daytoy nga aramid isu ti panagtulnod iti bilin iti Apo a kas mabasa ditoy Deut. 6:12-13
“Inton makadanon kayo iti naikari nga daga, ket agnaed kayon kadagiti napintas nga balbalayyo, ket addaan kayo iti adu nga apit ken napnuan nga taraon, saandak nga lilipatan. Indalan ken inlasatkayo iti let-sang ket inyeg kayo ditoy daga nga pagay-ayusan ti gatas ken diro.”
Gapu itoy nga bilin ti Apo, mamitlo nga agfiesta dagiti Israelitas, Fiesta ti Pascua bulan ti Abril nga panrugian iti ani; Fiesta ti Pentecostes bulan iti Junio, ken fiesta ti Tabernaculo iti bulan ti Nobyemre nalpasen amin nga ani.
Diyo kadi Makita nga daytoy nga bilin iti Apo para met kadatayo nga taga San Jose. Compostela. Wen napanglaw ken awanan kayo ti daga idiay Luzon isu nga inyeg dakayo ti Dios ditoy daga ti Kari tapno magun-odyo ti nasay-saya-at nga biag. Ti apo kunana saandak nga liplipatan inton sumayaat iti biagyo, addaan kayo iti balay, ken napnuankayo ti taraon.
Ti panagrambaktayo ita nga aldaw sinagudayna ti dua nga panggep: fiesta iti panagungar ken rambak iti fiesta ti apit.
Ti panagrambaktayo itoy daytoy nga agsapa ipakitana nga saanyo nga nalipatan ti bilin iti Dios. Ti pamagrambaktayo ngarud isut pakakitaan ti narungbo nga pammati ti Apo nga nasantuan.
Wen, saan laeng nga nasantuan no di ket naragsac met ti rambak tayo a kas igunamgunam iti Salmo 100:1-5
“Ipukkaw-yo a siraragsak ti nagan ti Apo, dakayo amin a sangalubu-ngan.Agserbi kayo iti Apo a siraragsak. Umaykayo iti sanguananna a napnuan ti narag-o nga kankanta. Ammoenyo nga isu ti Dios ken isu ti namarsua kadatayo. Datayo dagiti tattaona ken karnero nga ipastoranna. Sumrekayo iti balayna nga napnuan ti panagyaman ken ipaayyo iti narag-o nga kankanta iti tronona.Wen, mangtedkayo ti panagyaman, ken Bendisyonanyo ti naganna, ta ti Dios naimbag, ket ti kinamagayatna agnanayon.
Kakabsat kitaenyo dagiti gunangunam ti Salmo nga aramidentayo iti daytoy nga aldaw: Ipukkawyo…Agserbikayo…Umaykayo…Ammoenyo…Sumrakkayo…Mangtedkayo… Bendisyonanyo.
Kitaen ken imutektekantayo dagiti aramid nga tarigagay ti apo iti daytoy nga panarambak tayo iti apit.
1. Ti Panagyaman Isu ti Panagragsak– (Ipukkawyo)
Denggen yo ti kuna ti Salmistaditoy versiculo uno:
Ipukkaw-yo a siraragsak ti nagan ti Apo, dakayo amin a sangalubu-ngan
Kakabsat – Ti Dios isu ti nangaramid ken nangted kadatayo iti rikna nga panagragsak. Banag ngarud nga pagrakantayo dagiti ar-aramid ni apo iti biagtayo. Luktanyo dagiti matayo ket makitayo dagiti nakaskasdaaw nga aramid ti Dios kadatayo. Inikkandakayo ti pigsa nga bimmangon itay agsapa. Isu ti nangted kadakayo iti insuotyo nga napintas nga badbadoyo. Isu ti nangipaay kadakayo iti angesyo. Wen amin nga naimbag nga sagut naggapu kencuana. Diba umanay daytoy nga rason tapno ipukkaw tayo iti dios ti kinaragsaktayo? Isu ti namarsua kadatayo, nangtaraken kadatayo. Wen ti matana sikikita kadagiti billit ket ammona no maysa kadakuda ket matnag itit daga. Ket kasta met nga ammona no mano dagiti bilang ti bookyo. Ti Dios madaydayaw!
No bilangentayo amin dagiti bendisyonna kadatayo, sigurado nga saanyo nga mabalin amin ida.
Adda maysa nga daniw nga kayatko nga ibingay kadakayo, no kasano ti panagrambak iti panagyaman:
Bilangenyo dagiti bendision nga na-awatyo embes nga dagiti crossyo.
Bilangenyo dagiti ganansiyayo embes nga dagiti napucawyo.
Bilangenyo dagiti panagrag-oyo embes nga dagiti panagladingit yo.
Bilangenyo dagiti gagagayyemyo embes nga dagiti kalabanyo.
Bilangenyo dagiti issemyo embes nga dagiti luluayo.
Bilangenyo ti kinaturedyo embes nga dagiti panagbutengyo.
Bilangenyo dagiti tawen ngs nagapit kayo embes nga dagiti tawen nga nagkalgaw ti taltalonyo.
Bilangenyo to kaadu ti naimbag nga inaramidyo embes nga dagiti nagkapsutanyo.
Bilangenyo ti kinasalun-atyo embes nga dagiti kinabaknang yo.
Wen agkamatlekyo iti Apo embes nga kadagiti bag-bagiyo.
Wen kakabsat, no dagiti amin nga aramid ken plano tayo agpalso, ti Dios ti pagkamatalkan tayo.Isu ti gayyem tayo nga saan nga mangbaybay-a. Idalannatayo uray pay nasipnget ti pagnaan. Pulutannatyo iti lana no agsakit-tayo.
Ipaayandatayo ti naimas nga taraon ken dagiti kasapulan tayo. Wen, ti Dios ti mangay-aywan kadatayo. Ket saandatayo nga baybay-an.
Agraksaktayo ngarud! Ti Dios Naimbag, ket ipuukaw tayo ti kinamagayat agnanayon.
Ti maikadua nga aramidentayo isu panagserbi.
2. Panagyaman isu iti Panagservi – (SERVE)
Ti bersikulo kunana:
Agserbi kayo iti Apo a siraragsak.
Ti Biblia igunamgunam na
“Ania ti pagayatan ti Dios kadakayo?, Di met isu ti panagbutenyo iti Dios, panagnayo iti dalan iti Apo, panagayatyo kencuana ken panagserbiyo iti Dios babaen iti amin nga pusuyo, cararuayo ken iti panagtulnog cadagiti amin nga bilbilinna para iti pagsiatanyo?” Deut. 10:13 (NASV)
Kankanayon nga tarigagay ti Dios isu ti panagserbitayo kencuana. Ti Dios kinunana ken ni Faraon:
“Palubusan dagiti taok, ta agserbida kaniak idiay let-ang..” Exodus 7:16 (NASV)
Ni Jesus kunana met nga ti panagserbi isut kangatuan nga baanag iti biagtayo:
“Saankayo nga makapgaserbi iti dua nga amo, no ayatenyo ti maysa ket kagurayo ti maikadua.
Saanyo nga mabalin nga paserbian ti Dios ken kinabaknang.” Mat 6:24 (NASV)
No sinno ti pagserbiantayo, ipakita no sadinno ti banag nga importante iti biagtayo. Nangegko nga kunada:
No naparsuatayo, ti Dios ti namarsua kadatyo.
No carnerotayo, ti Dios pastortayo.
No sumrektayo iti tronona, ti Dios ti Aritayo.
No isu ti pagserbiantayo Ti Dios ti Amotayo..
Ngem kitaenyo, ti Dios kayatna nga agserbitayo, wen saan laeng nga
agserbitayo kenucana, no di ket agserbitayo kencuana nga siraragsak.” Di na kayat ti panagserbi nga naliday, nakasimangot ken napilpilit nga panagserbi. Bilangentayo nga maysa nga pribilihiyo iti gundaway panagserbi iti Dios. Isu ti Ari dagiti ar-ari ken Dios dagait amin nga Dios. Agserbitayo ngarud iti Dios nga napnuan rag-o ken ragsak.
Adda maysa nga apit nga tarigagayan ti Apo a mabasa ditoy Juan 4:27-42 isu ti panagani kadagiti cararua iti talon ti apo. Mano dagiti cararua nga naapityo daytoy nga tawen? Mano dagiti naaniyo nga cararua nga adda ditoy Iglesyatayo daytoy nga tawen?
Damagek man no mano ti tawenyon nga Iglesya? Damagek man manen no mano ti nayanakyo nga Iglesya? Ti Iglesya saan nga agminipos, aganak ken aganak, ta daytoy ti biagtayo a kas kunaen ti bilin ti Apo: “Incayo iti main nga lubong, iacasabayo ti naimbag nga damage, buniagyo ida ket pagbalinen amin ida nga adalanko”
Daytoy ti misyon ti Iglesia tayo, pagbalinentayo amin nga tattao nga dalan ti Dios ken ma-isserek ida iti pagarian ti Dios.
3. Ti Paanagyaman Isut Panagdaliasat. – (Umaykayo)
Ti bersikulo dos kunana:
“Umaykayo iti sanguananna a napnuan ti narag-o nga kankanta.” Psalm 100:2 (NASV)
Ti panagyaman saan laeng nga stationary no di ket adda panaggunay kadagiti umay agyaman ken ti umawat iti panagyaman. Wen, adda awis ti panagyaman, sumrektayo iti ruangan, ket kankantaan tayo a siraragsak ti Apo a Diostayo.
Wen, kakabsat, ti panangyaman isu ti awis ti Dios nga mapantayo kencuana. Ditay ngarud masdaaw no kuna ni Jesus:
“Umaykayo kaniak, dakayo amin nga madagdagsenan ta ikkankayo iti inana.Matthew 11:28 (NASV)
Inikkandatayo ti Dios ti adu nga bendisyon, ti rumbeng nga sungbattayo ngarud isut panaggunay ken ya-asideg nga mapan kencuana tapno agyaman kadagiti amin nga aramidna.
Kankanayon nga umas-asidegtayo kencuana. Wen, mapantayo kencuana.
Ti maikdaua nga kitaentayo isu daytoy:
4. Panagyaman Isut Pannaka-awat – (Ammoenyo)
Ti bersikulo three, kunana:
“Ammoenyo nga isu ti Dios ken isu ti namarsua kadatayo. Datayo dagiti tattaona ken
karnero nga ipastoranna.” Psalms 100:3 (NASV)
Daytoy nga bersikulo igunamgunam na ti dua nga banag:
A. Ti Dios ti namarsua kadatayo.
B. Isu ti akinkukua kadatayo.
Kitaentayo daytoy nga banag:
1). Ti Dios ti nangaramid kadatayo, saantayo nga pinarsua dagiti bagbagitayo. Daytoy nga kinasirib ipakitana nga ti Dios ti mangay-aywan, mangidalan ken mangbibiag kadatayo.
Ti Salmista kunana: “Sika O Dios ti nangaramid ti amin a parti ti bagik, ken sika ti nanglaga kaniak iti tian ni nanangko.” Psalms 139:13 (NASV)
2.) No isu ti nangaramid ken namarsua kadatayo, kayatna nga sawen nga kukuadatayo. Taodatayo ti Dios, karnero ti naimbag nga pastor. Isu ti agtagikua kadatayo.
Ammeon ken awatentayo nga ti biagtayo agdepennde iti bileg, ayat ken pagayatan iti Dios. Awan ngarud ti tiempo ken banag nga panagpalanguad nga nga ditayo kasupulan ti tulong ti Apo.
Banag nga napudno, ti biagtay ngarud kankanayon ng napnuan iti
panagyaman.
5. Ti Panagyaman isut Panagtakdertayo iti sango ti Apo. – (Sumrec)
Sumrekayo iti balayna nga napnuan ti panagyaman ken ipaayyo iti narag-o nga kankanta iti
tronona.” Psalms 100:4 (NASV)
Ti mensahe daytoy nga bersiculo isu daytoy: no mangtedtayo iti Panag- yaman, aramidentayo iti sangoanan ken saka-anan iti Dios. Isu ti sentro ti panagdaydayaw ken pangipa-ayantayo ti panagyaman. Ti panagyaman ngarud maaramid iti Ispiritu ti panagdaydayaw, ken iti sango ti Dios.
No malpas dagiti amin ng aramidtayo, no adda balligitayo, no nasalun-attayo ken naragsaktayo, tumangadtayo iti Dios ket kunatayo, “Agyamanak unay Apo.”
6. Ti Panagyaman isut Panangipaay ti Sacrifisyo – (Pannangted)
“Wen, mangtedkayo ti panagyaman” (Psalms 100:4)
Ti panangted iti Dios isut aramid nga sacrifisyo. No agdaydayaw tayo iti Dios, it-itedtayo ti nasantoan nga sacrifisyo. Ipaaytayo ti tiempo tayo, pigsatayo, ken atensiyontayo. Ket no idatontayo ti biagtayo, sidadaan tayo ngarud nga mangipaay iti talentotayo, sanikua nga impaaywan kadatayo. ken panagserbitayo.“
Ni San Pablo igunamgunam-na:
“Dawatec kadakayo kakabsat, nga babaen ti grasya ti Dios idatonyo dagiti bagbagiyo as kas daton nga sibiag, nasantuan a sacrifisyo ken maka-ayayo iti Dios nga isu ti rumbeng nga panagdayawyo.” Romans 12:1 (NASV)
Kakabsat, ania dagiti rumbeng ken insaganayo nga ited a kas panagyaman ti Diostayo? Laglapenyo, saan nga completo ti panagyamanyo iti daytoy nga panagrambak iti apit no diyo ited ken ipaay a kas panagdayaw dagiti nasantuan ken agluplupias nga sagutyo iti Dios a kas mayan-nurot iti bendisyon ti Dios kadakayo.
7. Panagyaman isut Panangbensyon iti Nagan ti Dios. – (BLESS)
“Bendisyonanyo ti naganna,” Psalms 100:4 (NASV)
Ti Dios naragsak no bandisyonan dagiti annakna ti naganna.
Daytoy ti kinapudno, ti 100 nga Salmo –saan nga maipapan kadatayo, no di ket iti Dios. Ania ti makitatayo: Bersikulo uno makitatayo ti nagan iti Dios nga Apo ti sangalubungan; bersikulo dos, makitatayo ti nagan ti Dios nga agtarigagay nga agragsaktayo ken agrambaktayo. Bersikulo tres makitatayo ti nagan ti Dios nga namarsua ken mangay-aywan kadatayo.Ket iti bersikulo cuatro, makitatayo ti nagan ti dios nga mangaw-awis nga sumrektayo iti panagyaman, panangted ken panagdaydayaw.
Rumbeng ngarud nga bendisyonantayo ti naganna. Ti naganna natan-ok. Ti aramidna nakaskasdaaw! Ti ayatna ken kinaimbagna agnanayon!
Sipapakumbaba ken iti Espiritu panagdaydayaw ikararagtayo:
Bendisyonam ti Dios, O cararuac, ken amin nga adda kaniak, bendisyonam ti naganna.
Bendisyonam ti Dios, O cararuac, ken amin nga adda kaniak, bendisyonam ti naganna.
Bendisyonam ti Dios, O cararuac, ken amin nga adda kaniak, bendisyonam ti naganna.
Maadaantayo ngarud iti nasantuan, naragsak, ken nabunga nga panagyaman iti amin nga kinaimbag ti Dios kadatayo ditoy San Jose, Compostela.